Presidentja e vendit, Vjosa Osmani, ka shprehur ngushëllime për ndarjen nga jeta të ish-kryeparlamentarit të Kosovës, Nexhat Daci.
Osmani ka theksuar se Daci ishte një personalitet i rrallë, i cili bashkoi dijen shkencore, përkushtimin akademik dhe angazhimin institucional, duke lënë gjurmë të pashlyeshme si Kryetar i Kuvendit, deputet, akademik dhe udhëheqës i institucioneve shkencore të vendit.
Ajo ka shtuar se kontributi i tij shumëdimensional në ndërtimin e shtetit, në zhvillimin e arsimit të lartë dhe në avancimin e shkencës do të mbetet pjesë e rëndësishme e historisë institucionale dhe intelektuale të Kosovës.
“Me pikëllim të thellë mora lajmin për ndarjen nga jeta të ish-Kryeparlamentarit të Republikës së Kosovës, akademikut dhe profesorit të nderuar, Nexhat Daci. Akademik Daci ishte një personalitet i rrallë, i cili bashkoi dijen shkencore, përkushtimin akademik dhe angazhimin institucional. Në vitet më të rënda për popullin e Kosovës, veçanërisht gjatë viteve ’90, ai u angazhua fuqishëm në shërbim të kauzës për liri dhe pavarësi. Kontributi i tij shumëdimensional do të mbetet pjesë e rëndësishme e historisë sonë institucionale dhe intelektuale. Në këto çaste të rënda, shpreh ngushëllimet më të sinqerta për familjen Daci, miqtë dhe bashkëpunëtorët. I përhershëm qoftë kujtimi për akademik Nexhat Dacin”, ka shkruar Osmani në Facebook./teve1.info/
