Boksieri i njohur britanik Anthony Joshua raportohet se ka mbetur i lënduar në një aksident të rëndë automobilistik në Nigeri, i cili i ka marrë jetën dy personave, sipas disa mediave ndërkombëtare.
Ngjarja ka ndodhur të hënën në mëngjes, më pak se dy javë pasi Joshua kishte triumfuar me nokaut ndaj Jake Paul në një ndeshje të zhvilluar në Miami. Sipas The Telegraph, automjeti ku ndodhej Joshua, 36 vjeç, është përplasur me një kamion të ndalur në një autostradë të ngarkuar.
Media nigeriane Punch raporton se aksidenti është aktualisht nën hetim nga autoritetet lokale. Ndërkohë, një fotografi e publikuar nga vendngjarja tregon Joshua pa bluzë, i rrethuar nga xhama të thyer, ndërsa burime pranë tij bëjnë me dije se ai ka pësuar lëndime të lehta.
Deri më tani nuk ka një reagim zyrtar nga përfaqësuesit e boksierit apo nga federatat sportive, ndërsa priten më shumë detaje lidhur me rrethanat e aksidentit dhe gjendjen shëndetësore të sportistit.
