Lidhja Demokratike e Kosovës (LDK) ka përmbyllur fushatën zgjedhore për zgjedhjet e parakohshme me një tubim përmbyllës të mbajtur në Prishtinë.
Në këtë tubim, kandidati i LDK-së për kryeministër, Lumir Abdixhiku, ka theksuar rëndësinë e partisë së tij për stabilitetin politik dhe funksionimin e shtetit, duke deklaruar se pa LDK-në nuk mund të ketë orientim të qartë dhe institucione që respektojnë qytetarin.
“Pa LDK-në nuk ka stabilitet, orientim e shtet që respekton qytetarin e vet. LDK-ja vjen për të ndërtuar të ardhmen dhe për të punuar për të mirën e secilit”, tha Abdixhiku para mbështetësve.
Ai u shpreh se LDK-ja përfaqëson një forcë politike të mendimit dhe jo të zhurmës, duke shtuar se është një lëvizje e njerëzve të lirë dhe jo një turmë e komanduar.
“Kjo është LDK-ja që e kemi dashur gjithherë, një shtëpi ku fjala ka peshë, ku dinjiteti ka vlerë dhe ku Kushtetuta ka qenë gjithmonë mbi secilin prej nesh”, deklaroi ai.
Abdixhiku foli edhe për rrjedhën e fushatës, duke theksuar se ajo ka dëshmuar lodhjen e qytetarëve nga mungesa e drejtimit politik dhe institucional.
Në fund, Abdixhiku deklaroi se Lidhja Demokratike e Kosovës nuk është një parti e momentit, por e momenteve historike, duke shprehur bindjen se LDK-ja do të luajë rol kyç në të ardhmen politike të vendit.
