Eksperti i sigurisë, Agim Musliu, ka reaguar përmes një postimi në Facebook, duke deklaruar se të drejtat e serbëve të Kosovës janë të garantuara dhe të zbatuara nga Republika e Kosovës, e jo nga Serbia.
Sipas Musliut, këto të drejta janë ndërtuar dhe ofruar në koordinim me partnerët ndërkombëtarë, ekskluzivisht për serbët e Kosovës dhe jo për interesat e Serbisë.
“Fakt i pakontestueshëm është se të drejtat e serbëve të Kosovës janë të garantuara dhe të zbatuara nga RKS, jo nga Serbia, cilat janë ndërtuar dhe ofruar në koordinim me partnerët ndërkombëtarë, për serbët e Kosovës dhe jo për Serbinë”, ka shkruar Musliu.
Ai ka theksuar se në kohën kur këto të drejta janë dhënë, Kosovës i ishte premtuar njohja nga Serbia, si dhe nga shtetet e Bashkimit Evropian dhe NATO-s, gjë që sipas tij nuk ka ndodhur.
“Sot, në vend të njohjes, Serbia po i keqpërdor këto të drejta për të mbajtur peng serbët e Kosovës dhe për ta sabotuar Kosovën nga brenda përmes Listës Serbe”, ka shtuar ai.
Musliu ka vlerësuar se kjo situatë nuk mund të vazhdojë dhe ka kërkuar reagim të fuqishëm nga partnerët ndërkombëtarë të Kosovës.
“Kosova nuk mund të lejojë që kjo gjendje të vazhdojë. Partnerët e Kosovës duhet të reagojnë fuqishëm për ta parandaluar këtë veprim sabotues të Serbisë”, ka shkruar Musliu.
Duke iu referuar zhvillimeve të sigurisë, Musliu ka kujtuar se sulmi agresor dhe terrorist në Banjskë, sipas tij, është udhëhequr nga Milan Radoiçiq, nënkryetar formal dhe kryetar de facto i Listës Serbe.
“Sulmi agresor dhe terrorist në Banjskë u udhëhoq nga Milan Radoiçiq. Më pas u krye sulmi terrorist ndaj kanalit Ibër-Lepenc. Sot po zhvillohet një fazë e re e sulmit, që është sulm ndaj rendit juridik dhe kushtetues të Kosovës nga brenda”, ka theksuar ai.
Në fund, Musliu ka paralajmëruar se këto veprime përbëjnë alarm serioz për sigurinë rajonale dhe ka bërë thirrje për veprim të menjëhershëm ndërkombëtar.
“Këto veprime të Serbisë janë alarm serioz për sigurinë rajonale. Kalimi i tyre pa sanksione të qarta dhe pasoja konkrete rrezikon seriozisht stabilitetin. Është koha për veprim në Bruksel dhe në Uashington. Çdo vonesë rrit rrezikun, jo vetëm për Kosovën, por për gjithë rajonin”, ka përfunduar Musliu.
