Ish- nënkryetari i PDK-së, Xhavit Haliti është shprehur pro një koalicioni me Lëvizjen Vetëvendosje, nëse siç ka thënë ai dy kandidatët për kryeministër merren vesh dhe krijojnë një program.
Haliti ka thënë se asnjë parti në Kosovë nuk është e dhunshme që siç ka thënë ai nuk ka sjellë pushtues apo që është parti fashiste.
“Programi duhet të bëhet i përbashkët kushdo që e bënë qeverinë. Programi i ndan ose i bashkon. Në qoftë se dy partitë pajtohen unë s’kam asgjë kundër Vetëvendosjes. Nëse dy kandidatët për kryeministra i diskutojnë çështjet dhe pajtohen me zbatua një program atëherë pse mos me hy në koalicion bashkë”, ka thënë ai në emisionin “InfoNata” në Tëvë1.
Por, ai ka thënë se fushata e tyre e as programi nuk është ndërtuar për një koalicion me LVV-në.
“Unë nuk po them që fushata jonë, programi ynë është e nderuar në atë mënyrë që ne nuk do të kemi marrëveshje me Vetëvendosjen për sa kohë ajo është në pozicion të tillë. Është një pozicion që e ka sjellë Kosovën buzë falimentimit”, është shprehur ai.
Haliti ka thënë se pret që pas zgjedhjeve të 28 dhjetorit do të formohet Qeveria e re, por sipas tij, ka me qenë problem zgjedhje e presidentit të vendit.
Ai ka kritikuar deklarata dhe akuzuat që po bëjnë partitë ndaj njëra tjetrës, duke përmendur edhe deklaratën e kryetarit të Skenderajt nga PDK, Sami Lushtaku i cili kishte thënë se “ata që nuk e respektojnë kushtetutën, vendin, qytetarët duhet me dalë mi ngreh zvarrë në rrugët e Prishtinës”.
Nuk është problemi i vijave të kuqe, sepse askush këtu asnjë parti nuk është e dhunshme, nuk na ka sjellë pushtues, nuk janë parti fashiste. Se unë po i dëgjoj jo me ngreh atë zhag , ose me luftua ose mos me pranua. Ne jemi të gjitha parti të Kosovës dhe të gjithë duhet me krye detyrat tona”, ka thënë ai.
