Kandidati për deputet nga radhët e Partisë Demokratike të Kosovës Muzafer Shala, ka deklaruar se ky subjekt politik është i hapur për bashkëpunime paszgjedhore dhe se nuk ka vija të kuqe për asnjë parti politike, duke theksuar se kjo çështje do të diskutohet pas zgjedhjeve të 28 dhjetorit.
Ai ka shtuar se aktualisht fokusi i PDK-së është bindja e qytetarëve se pushteti aktual duhet të largohet, pasi, sipas tij, ka mashtruar dhe u ka shkaktuar dëm qytetarëve në aspekte të ndryshme, duke mos i realizuar premtimet e dhëna.
“Është herët të flasim për bashkëpunime. Ne besojmë se do të jemi partia e parë që do të dalë nga zgjedhjet. Nuk kemi vija të kuqe me asnjë parti politike dhe këto çështje do të diskutohen në këshillat e Partisë Demokratike të Kosovës, pasi kemi një proces të brendshëm shumë demokratik. Gjatë kësaj kohe jemi të interesuar t’u tregojmë qytetarëve se pushteti aktual i ka mashtruar, u ka shkaktuar dëm, u ka dhënë premtime të mëdha që nuk i ka realizuar dhe se ky pushtet duhet të largohet. Mendoj se po arrijmë ta përcjellim këtë mesazh përmes kuadrove që i kemi në listën tonë dhe në të gjitha degët e partisë”, ka deklaruar Shala.
Duke folur në emisionin “Ditari” në Tëvë1 për kandidatin e PDK-së për kryeministër, Bedri Hamza , Shala ka thënë se ai nuk është figurë polarizuese.
“Bedri Hamza nuk është polarizues. Ekipi ynë nuk është polarizues, por është ekip që i dëgjon qytetarët dhe jeton me hallet e tyre, jo për të krijuar polarizim siç kemi parë gjatë pesë viteve të fundit,” përfundoi Shala./teve1.info/
