Komisioni Qendror i Zgjedhjeve (KQZ) ka akredituar grupin e pestë me 169 vëzhgues për zgjedhjet e së dielës, më 28 dhjetor.
Numri i përgjithshëm i vëzhguesve deri më tani nga KQZ është mbi 19 mijë dhe në mesin e tyre janë subjekte politike të certifikuara, organizata joqeveritare vendore, organizata ndërkombëtare, media vendore e ndërkombëtare dhe institucione shtetërore dhe përfaqësi diplomatike.
Drejtori i Zyrës për Regjistrim, Certifikim dhe Kontrollin Financiar të Subjekteve Politike, Besnik Buzhala, ka kërkuar që të mos akreditohet një organizatë vendore me arsyetimin se nuk ka përmbushur kriteret ligjore.
“Organizata joqeveritare ‘Instituti për Qeverisje të Mirë dhe Sundim të Ligjit’ ka aplikuar për tu akredituar si organizatë vëzhguese në zgjedhjet që mbahen më 28 dhjetor 2025. Zyra ka vlerësuar gjithë dokumentacionin dhe konstaton se statuti i kësaj organizate që ndërlidhet me qëllimin dhe fushëveprimin nuk ndërlidhet drejtpërdrejt me monitorimin e proceseve zgjedhje apo me mbrojtjen e të drejtave të njeriut ashtu siç kërkohet në nenin 54 për zgjedhjet e përgjithshme. Dhe për rrjedhojë nuk janë përmbushur kriteret ligjore për akreditim si organizatë vëzhguese zgjedhore. Lidhur me këtë Zyra i rekomandon KQZ-së që të refuzojë kërkesën për akreditim të organizatës joqeveritare “Instituti për Qeverisje të Mirë dhe Sundim të Ligjit’”, u shpreh ai.
Kjo kërkesë është konsideruar jo normale nga anëtari i Aleancës për Ardhmërinë e Kosovës, Muharrem Nitaj.“Më duket jo normale që të ngritet dorë për mos akreditim, nëse fjala është nxjerret propozimi i sekretariatit që të mos akreditohet, e ne e miratojmë atë të zyrës, sekretariatit po. Do të thotë e miratojmë propozimin për mos akreditim”, u shpreh ai.
Ndërkaq, anëtari nga Lëvizja Vetëvendosje, Alban Krasniqi theksoi se është e domosdoshme që të rishikohet rregullorja.
“Është imediate pas këtij procesi zgjedhor rishikimi i rregullores dhe ne kemi arritur një akt të rëndësishëm kur i kemi hequr shoqatat e gjuetarëve, sepse edhe me shoqata të gjuetarëve kanë ardhur edhe kanë aplikuar për vëzhgim në zgjedhje. Edhe në këtë rast shoh organizata nganjëherë, të cilat i njohim të cilat janë, pa marrë parasysh pikëpamjet që mund të kemi, ato janë organizata pjesë e shoqërisë tonë edhe e dhënë kontributin e tyre në demokraci, në zhvillimin e demokracisë, por që na ndihmojnë shumë edhe informacionet që mund të na japin edhe organizatat në këtë rast, por organizata që janë pak a shumë fiktive, që ngjallen veç kur ka procese zgjedhore, edhe që jashtë kësaj pastaj nuk kanë kurrfarë veprimtari edhe është problem pastaj sepse ekziston rreziku të stërmbushen me individë vëzhgues që vijnë me prapavijë partiak apo politik por që vijnë edhe të themi bëjnë vëzhgimin e zgjedhjeve”, ka thënë ai.
Në të njëjtën mbledhje nuk është akredituar për vëzhgim edhe një organizatë ndërkombëtare “Odbor za kontrolu i opservaciju-OKO”.
