Autori: Adea Mustafaj
Zhurma e gjeneratorëve po dëgjohet në gjithë fshatin Ratkoc të Rahovecit.
Ratkoci prej ditësh po përballet me probleme të energjisë elektrike.
Miradije Morina që ka ardhur në Kosovë për pushime, është e pakënaqur më këto reduktime.
“Sa herë po vim gurbeqart, kurr rrym spo kemi mu knaq, as spo kemi me kqyr televizor, as spo kemi kurgjo hiq. U mërdhinëm. Na po vim prej sejut të dynjes, poi lojna krejt paret në Kosovë e të nxeht spo kemi”, ka thënë Morina.
Por ky nuk mbetet fshati i vetëm i Rahovecit që po përballet me probleme me energjinë elektrike.
Të njëjtin hall e kanë edhe në fshatin Vrajak.
“Ky problem është prej maslufte. Ka pas reduktime edhe më të gjata, pesë orë, gjashtë orë. Kohen e fundit nuk ka pas, port ash për momentin mbrenda ditës ndalet një hërë apo dy dhe zgjatë një orë ma shumë se besoj…Kam dëgju prej shokëve që ka pas një proflem në fshatin Xërxë apo besoj që është evitu. Një natë ka pas ndërprerje më të gjatë dhe mbrenda një nate është rregullu dhe mendoj që skemi mo problem. Po po e shoh që është e ndalur rryma kohë pas kohe me reduktime”,ka thënë një qytetarë
Nga KEDS thonë se ky problem vjen si pasoj e mungesës së kapaciteteve pas mbingarkesave në nivelin e transmisionit.
“Problemi të cilin e keni parashtruar, vjen si mungesë e kapaciteteve pas mbingarkesave në nivelin e transmisionit, për çka ka dalë me njoftim edhe KOSTT. Ajo çka mund të themi është që nuk ka reduktim, vetëm kufizim të energjisë elektrike nga ana e KEDS-it, kjo për shkak të ngarkesave në nivelin e transmisionit”, ka thënë Dallaveraj.
E Operator Sistemi, Transmisioni dhe Tregu-KOSTT, thotë se ditëve të fundit konsumi i energjisë elektrike ka tejkaluar edhe rekordet e mëparshme të ngarkesës së regjistruar në sistem.
Andaj u bëjnë thirrje qytetarëve që ta kursejnë energjinë elektrike.
“Sistemi Elektro-Energjetik i Kosovës vazhdon të përballet me ngarkesë të rritur, veçanërisht gjatë orëve të pikut. Ditët e fundit, konsumi i energjisë elektrike ka tejkaluar edhe rekordet e mëparshme të ngarkesës së regjistruar në sistem. Konsumi më i lartë vërehet kryesisht në intervalet kohore 09:00–12:00, 16:00–20:00 dhe 22:00–23:00 Ndaj ftojmë të gjithë konsumatorët që kur të jetë e mundur, të zhvendosin përdorimin e pajisjeve me konsum të lartë të energjisë në orë jashtë pikut, veçanërisht pas mesnatës, kur konsumi është dukshëm më i ulët”, kanë thënë nga operator sistemi, transmision dhe tregu-KOSTT
Kujdes të shtuar nga zonat e tjera, KOSTT kërkon nga Rahoveci, Malisheva, Prizreni, Dragashi, Gjilani dhe Lipjani.
