Kryetari i Lidhjes Demokratike të Kosovës (LDK) dhe kandidati i partisë për kryeministër, Lumir Abdixhiku, ka prezantuar 10 zotimet kryesore të LDK-së, të cilat i ka cilësuar si të qarta, me plane konkrete dhe përgjegjësi ndaj qytetarëve.
Në një postim në Facebook, Abdixhiku ka bërë thirrje për qytetarët që të zgjedhin “shpresën për familjet, të rinjtë dhe të ardhmen e vendit”.
Programi i prezantuar përfshin rritje të pagave për sektorë kyç, përfshirë pagë 1,000 euro për mësuesit dhe 900 euro për policët, ushtarët dhe zjarrfikësit, si dhe një reformë të sistemit të pagave për rreth 80,000 punëtorë publikë.
Po ashtu, parashihen pensione prej 300 eurosh dhe përfitime për të porsalindurit dhe të diplomuarit, duke garantuar mbështetje financiare dhe punësim pas diplomimit.
Investimet në arsim dhe fëmijë përfshijnë mësim tërëditor, ndërtimin e 80 çerdheve, një fond prej 1 miliard eurosh për fëmijët dhe trajnime ICT për 40,000 të rinj.
Në aspektin ekonomik dhe infrastrukturor, LDK premton përfundimin e rrugëve strategjike kombëtare, përfshirë unazën e kryeqytetit, autostradën e Gjilanit dhe magjistralet kryesore.
Programi përfshin edhe projekte kapitale si centrali me gaz, spitali i ri, stadiumi kombëtar dhe zhvillimi i Brezovicës, me synim sigurinë energjetike, shëndetësi moderne dhe zhvillim turistik.
