Një vendim për t’ua bërë më të lehtë jetesën pensionistëve u mor dy ditë më parë.
Të mërkurën, Gjykata Supreme njoftoi se tanimë të njëjtit janë liruar nga obligimi që të dëshmojnë çdo gjashtë muaj që janë gjallë, në mënyrë që ta përfitojnë pensionin.
Ndonëse të duhur, të moshuarit, këtë vendim po e shohin si të vonuar.
“Kjo gjë është dashur qysh më herët të bëhet, a ka kuptim që në moshë me shku me prit me u lajmëru aty çdo gjashtë muaj se jena gjallë, ka pas instrumente dhe mundësi tjera”, tha pensionisti Burhan Kavaja.
E Azem Doda, që ka gati tri dekada që merr pensionin, thotë se për ta nuk po bëhet mjaftueshëm.
“Te na nuk kanë shikuar hiç deri tash, e tash e tutje të shohim, ne po presim mirë e veç po bohet keq e më keq, çmimet po rriten e pensionet po rijnë në vend këtë edhe fëmija e di që nuk është mirë”.
Vendimin e Supremes e kanë mirëpritur edhe nga Lidhja e Pensionistëve të Kosovës.
“Nëse flasim për vendimin e gjykatës është një vendim human që ka interes të shumanshëm pensionisti. Pasi që pensionisti është person i vjetër rrezikon të paraqitet gjatë kohës së verës, dimrit e tollovive në qytet e domethënë është një interes shumëdimensional. Për këtë e mirëpresim këtë vendim”, tha kryetari i Lidhjes së Pensionistëve të Kosovës, Sherif Kastrati.
Por a mund të rimbursohen pensionistët për pensionet e humbura?
“Pensionistëve u takon e drejta e kompensimit, mirëpo kjo e drejtë duhet të realizohet nëpërmjet kërkesës pranë Departamentit për Pensione, e cila në rast se refuzohet e njëjta duhet të vazhdoj me procedurë gjyqësore duke parashtruar padi, nëpërmjet të cilës kërkojnë pagesa retroaktive në procedurën administrative dhe pagën retroaktive të pensioneve në të cilat nuk janë paguar për shkak të mos lajmërimit me kohë brenda gjashtë muajve”, tregoi Asdren Bytyqi.
Kujtojmë se rreth dy muaj më parë, në Gjykatën Supreme ishte dorëzuar një padi e cila kishte për qëllim shfuqizimin e Udhëzimit Administrativ për procedurat e lajmërimit, suspendimin nga pagesa dhe kthimin e mjeteve në rastet e keqpërdorimit të pensioneve.
