Ministri në detyrë i Shëndetësisë, Arben Vitia, dhe Kryetari i Komunës së Fushë Kosovës, Visar Prebreza, në prani të kryeministrit në detyrë, Albin Kurti, të enjten kanë nënshkruar një marrëveshje bashkëpunimi për ndërtimin e Qendrës së re Kryesore të Mjekësisë Familjare (QKMF) në këtë komunë.
Sipas njoftimit zyrtar, projekti ka një vlerë prej 2.5 milionë euro dhe shënon ndërtimin e gjashtë QKMF-ve në komunat e vendit me financim nga Ministria e Shëndetësisë.
Kurti ka theksuar rëndësinë e investimeve në kujdesin parësor shëndetësor, duke e cilësuar atë si bazë të një sistemi shëndetësor funksional dhe të qëndrueshëm.
Ndërkaq, Vitia, ka vënë në dukje se kujdesi parësor është kontakti i parë i qytetarit me sistemin shëndetësor, prandaj investimet në këtë nivel mbeten prioritet për Ministrinë./teve1.info/
