Angelina Jolie ka vendosur të flasë hapur për herë të parë mbi shenjat fizike të mastektomisë së dyfishtë që kreu më shumë se një dekadë më parë.
Në një intervistë për Time France, aktorja 50-vjeçare shpjegoi pse ka zgjedhur pikërisht tani ta ndajë këtë pjesë kaq personale të historisë së saj.
“I ndaj këto shenja me gratë që dua. Dhe gjithmonë prekem kur shoh gra të tjera që tregojnë të tyret”, u shpreh Jolie.
Vendimi i saj lidhet ngushtë me historinë familjare. Nëna e saj, Marcheline Bertrand, humbi jetën në moshën 56-vjeçare pas një beteje me kancerin.
Në vitin 2013, Angelina Jolie zbuloi përmes një shkrimi në New York Times se analizat gjenetike kishin treguar praninë e gjenit BRCA1, i cili rrit ndjeshëm rrezikun për kancer gjiri.
Si masa parandaluese, ajo iu nënshtrua mastektomisë së dyfishtë dhe nëntë javë më pas, realizoi rindërtimin e gjoksit.
“Desha ta bëja publike për t’u thënë grave të tjera se ky nuk është një vendim i lehtë”, shprehej ajo atëherë.
Dy vite më vonë, në mars 2015, Jolie zbuloi se kishte kryer edhe heqjen e vezoreve dhe tubave falopianë, si masë parandaluese ndaj kancerit të vezoreves.
Aktorja thekson rëndësinë e aksesit të gjerë në testet gjenetike për BRCA, duke nënvizuar se çdo grua duhet të ketë mundësinë të informohet dhe të marrë vendime të ndërgjegjshme për shëndetin e saj.
