Kandidati për kryeministër i Lidhjes Demokratike të Kosovës, Lumir Abdixhiku, është zotuar se nëse udhëheq qeverinë, pensionet do të rriten gradualisht deri në 300 euro për secilin pensionist.
Gjatë tubimit elektoral në Komunën e Istogut, Abdixhiku e ka cilësuar këtë rritje si një shenjë respekti dhe garanci për një pleqëri me dinjitet.
“300 euro për secilin pensionist. Rritja do të bëhet gradualmente: 200 euro në vitin e parë, 250 euro në vitin e dytë dhe 300 euro në vitin e tretë. Ky është zotimi ynë. Ky është respekt për njerëzit që e ndërtuan këtë vend dhe garanci për një pleqëri me dinjitet”, ka thënë Abdixhiku.
Para mbështetësve në Istog, Abdixhiku ka prezantuar edhe kandidatët me të cilët LDK-ja përfaqësohet në këtë komunë: Serbeze Kabashi Muçaj, Shkëmb Manaj, Besim Mulaj dhe Ukë Rugova.
“Në Istog, LDK përfaqësohet nga kandidatë që janë krenari e këtij qyteti. Prof. Dr. Serbeze Kabashi Muçaj, me numër 15, mjeke dhe profesoreshë universitare, me mbi tri dekada përvojë profesionale dhe shërbim publik. Shkëmb Shaban Manaj, me numër 29, jurist i guximshëm dhe mbrojtës i Kushtetutës, zë i drejtësisë përballë pushtetit. Besim Mulaj, me numër 79, ekonomist dhe jurist nga Istogu, me përvojë të gjatë në administratë dhe angazhim të pandërprerë në LDK. Në Istog prezantuam edhe Ukë Ibrahim Rugovën me numër 10, ish-deputet dhe vazhdues dinjitoz i vlerave familjare rugoviane”, ka nënvizuar ai./teve1.info/
