Kandidati i PDK-së për deputet, Arben Mustafa, në emisionin “Këndi i debatit” në Tëvë1 ka folur për rolin e Bedri Hamzës në politikën e Kosovës, duke e cilësuar atë si figurën më unifikuese në skenën politike aktuale.
Mustafa ka theksuar se, sipas tij, ekziston një konsensus i gjerë në Kosovë se Hamza është politikani që sot ofron më së shumti bashkim dhe normalitet në jetën politike.
“Nuk mund të kontestohet roli unifikues që e ka Bedri Hamza në politikën e Kosovës. Mendoj që ekziston një konsensus i përgjithshëm në Kosovë se Bedri Hamza është politikani më unifikues në skenën politike, i vetmi që sot ofron një përbashkim të skenës politike. Ai është një politikan që me gjuhën e tij asnjëherë nuk ka nxitur përçarje, nuk ka ofenduar kolegët, partitë apo kryetarët e partive të tjera politike dhe asnjëherë nuk ka linçuar konkurrentët e tij politikë”, ka deklaruar Mustafa.
Ai ka shtuar se pikërisht kjo qasje është arsyeja pse qytetarët po afrohen me vizionin politik të Bedri Hamzës.
“Bedri Hamza është politikani dhe lideri më unifikues që e ka pasur Kosova. Kjo është arsyeja pse njerëzit po afrohen me vizionin e tij, sepse kanë nevojë për normalitet në skenën politike”, ka thënë Mustafa.
Duke folur për gjendjen e brendshme të Partisë Demokratike të Kosovës, Mustafa ka mohuar se ka përçarje, duke theksuar se partia është më e bashkuar se kurrë më parë.
“Sa i përket PDK-së, brenda partisë nuk ka përçarje. Ne jemi bashkë dhe kurrë nuk kemi qenë më të bashkuar se sot”, ka përfunduar Mustafa.
