Të paktën 40 palestinezë janë arrestuar nga ushtria izraelite gjatë bastisjeve ushtarake të kryera në mbarë Bregun Perëndimor të pushtuar, ka njofruar të mërkurën një organizatë për të drejtat e të burgosurve.
Shoqata Palestineze e të Burgosurve bëri të ditur në një deklaratë se mes të ndaluarve kishte edhe një fëmijë si dhe ish-të burgosur.
Bastisjet kishin në shënjestër qytetet Salfit, Jenin, Betlehem, Ramallah, Nablus, Tulkarem dhe Hebron.
Sipas deklaratës, forcat izraelite hynë me dhunë në disa banesa, ushtruan sjellje abuzive ndaj palestinezëve dhe shkaktuan dëme materiale gjatë operacioneve.
Dëshmitarë okularë i thanë Anadolu-t se në orët e para të mëngjesit forcat speciale izraelite, të mbështetura nga përforcime ushtarake, sulmuan lagjen lindore të qytetit Jenin dhe shndërruan një shtëpi në post ushtarak.
Pas këtij operacioni, Ministria Palestineze e Arsimit vendosi të pezullojë mësimin në shkollat e Jeninit për të garantuar sigurinë e nxënësve.
Sipas të dhënave palestineze, që nga fillimi i luftës në Gaza në tetor 2023, ushtria izraelite ka ndaluar gati 21,000 persona në Bregun Perëndimor.
Që nga shpërthimi i luftës në Gaza në tetor 2023, ushtria izraelite ka intensifikuar operacionet e saj ushtarake në Bregun Perëndimor të pushtuar.
Sipas shifrave palestineze, forcat izraelite dhe kolonët e paligjshëm kanë vrarë të paktën 1,097 palestinezë në Bregun Perëndimor të pushtuar, përfshirë Jerusalemin Lindor, dhe kanë arrestuar rreth 21,000 që nga tetori 2023.
