Kandidati për deputet nga Partia Demokratike e Kosovës, Xhavit Haliti ka akuzuar presidenten e Kosovës, Vjosa Osmani se me organizimin e takimit me mërgimtarët dy ditë para mbajtjes së zgjedhjeve, po bëhet pjesë e fushatës zgjedhore.
Ai ka thënë se takimet me mërgimtarët janë të mirëseardhura, por sipas tij, jo në prag të zgjedhjeve.
“Presidentja Vjosa Osmani, edhe publikisht, paska vendosur të bëhet pjesë e fushatës zgjedhore. Takimet me mërgimtarët janë gjithmonë të mirëseardhura, si në Kosovë ashtu edhe në perëndim, por shtrohet pyetja: pse pikërisht tani në kohë fushate, faktikisht në prag të zgjedhjeve? Presidente, luaje rolin kushtetues”, ka shkruar Haliti.
Presidenca ka njoftuar se Osmani do të organizojë pritje tradicionale për fundvit me mërgimtarët më 26 dhjetor.
Ky takim sipas njoftimit do të bëhet në shenjë mirënjohje për kontributin e mërgatës.
