Fotoreporteri amerikan Ron Haviv ka raportuar për vite me radhë nga zona të ndryshme konflikti, duke sjellë për publikun imazhe të rralla dhe të fuqishme.
Ai thotë se, pavarësisht ndryshimeve të mëdha në mënyrën se si njerëzit informohen sot, roli i fotoreporterëve mbetet thelbësor.
“Tani ka shumë gazetari qytetare, pamje nga ushtarët, video nga kamerat e trupit, dronë dhe materiale të tjera. Në këtë realitet të ri, roli ynë si fotoreporterë ka ndryshuar disi, por mbetet jashtëzakonisht i rëndësishëm, sepse ne hyjmë me një narrativë, integritet dhe mision për të treguar histori që zgjasin përtej fragmenteve të shkurtra vizuale”, thotë Haviv për Tëvë1.
Dokumentuesi i krimeve të luftës tregon nga përvoja e tij se shpeshherë interesi i publikut për një konflikt rritet dhe bie.
Ai rikujton kohën kur raportonte nga zonat e luftës në Ballkan.
“Interesi i publikut ngrihet dhe bie – njësoj si gjatë luftërave në Ballkan, ku shpesh askujt nuk i interesonte çfarë ndodhte në Sarajevë apo në Drenicë, e pastaj interesi kthehej sërish. Roli ynë sot mbetet i domosdoshëm dhe i vlefshëm, por jetojmë në një kohë me kaq shumë informacion sa që duhet kohë për të kuptuar plotësisht çfarë po ndodh”, shprehet fotoreporteri i luftës.
Haviv ka folur edhe për sfidat me të cilat përballen sot gazetarët palestinezë në përpjekjen e tyre për ta treguar historinë e tyre para botës.
“Puna e gazetarëve palestinezë është tejet e rëndësishme, sidomos sepse gazetarët ndërkombëtarë nuk lejohen të punojnë në terren, madje as gjatë armëpushimit. Ata mbajnë përgjegjësi të madhe, sepse duhet të tregojnë historinë e tyre, por edhe ta bëjnë atë të kuptohet globalisht. Ukraina është pak më ndryshe sepse ka qasje për gazetarët ndërkombëtarë, por dinamika është e ngjashme”, thotë ai.
Ron Haviv njihet për dokumentimin e gjerë të luftërave në ish-Jugosllavi: betejën e Vukovarit në Kroaci, rrethimin e Sarajevës, mizoritë në kampet serbe të përqendrimit në Bosnjë e Hercegovinë, si dhe spastrimin etnik të kryer nga “Tigrat e Arkanit”.
