Korporata Energjetike e Kosovës është duke operuar me tri njësite.
Kjo pasi blloku A3 i Termocentralit Kosova A është në remonte që nga data 31 tetor.
Madje ky bllok është dashur të kthehet në funksion të hënën por për shkak të problemeve , sanimet kanë vazhduar edhe gjatë ditës.
E për shkak të riparimeve që janë duke u bërë jashtë funksioni tash e një kohë është edhe njësiti A5 i termocentralit Kosova A.
Por kjo sipas zëdhënësit të KEK-ut, Skender Bucollit nuk e ka sjellë mungesë të prodhim me energji elektrike.
“Korporata Energjetike e Kosovës ju njofton se sot, më datë 08.12.2025, është duke operuar me njësinë A4 të TC Kosova A, si dhe me njësitë B1 dhe B2 të TC Kosova B, me një kapacitet të përgjithshëm prodhues prej 14,640 MËh. Vlen të theksohet se njësia A3 ka qenë në remont që nga data 31 tetor dhe, pas startimit të saj, është vlerësuar nevoja për ndërhyrje dhe sanime shtesë teknike gjatë kësaj jave. Megjithatë, sasia e energjisë së kësaj njësie është kompensuar dhe, bazuar në planin e nominuar nga KEK, nuk ka mungesë të prodhimit me energji elektrike”, ka thënë Bucolli.
Por sipas ekspertit të energjetikës, Adhurim Haxhimusa, vjetërsia e blloqeve ndikon që të ketë rënie të shpeshta të tyre.
“Vjetërsia dhe mungesa e investimeve për rivitalizimin e njësive apo blloqeve gjeneruese në dy dekadat e fundit te Kosovës A dhe Kosovës B e bënë sigurimin me furnizim me energji elektrike shumë të vështirë dhe kjo në të njëjtën kohë e rritë koston e furnizimit me energji elektrike për shkak të çmimeve të larta të importit, duke ditur se secili megavat që mungon duhet të sigurohet me importe shtesë”, është shprehur Haxhimusa.
E për këtë ai kërkon që të bëhen investime sidomos në energji të ripërtëritshme.
“Qeveria e Kosovës bashkë me institucionet tjera duhet të ndërmarrin hapa urgjent në përmirësimin e klimës për investime në kapacitete të reja gjeneruese e sidomos në ato të ripërtëritshme kjo është e vetmja mënyrë afatgjate si Kosova mund me siguru furnizim me energji elektrike por edhe te ketë në kontroll koston me energji elektrike ashtu që jo në secilin prill te kemi debate të njëjta për rritje të tarifave”, ka thënë tutje Haxhimusa.
Nga KEK mes tjerash kanë bërë të ditur se janë duke kryer të gjitha obligimet kontraktuale dhe operacionale si dhe duke siguruar stabilitet në furnizim të pandërprerë më energji.
