Sipas tij, mospërfshirja e veteranëve në Projektligjin për Pagën Minimale është një diskriminim i madh ndaj tyre.
“Anashkalimi i veteranëve mendoj që është problem, për shkak se ky është një diskriminim. Unë kam një bindje që kurdo ligji e merr fuqinë e plotë, në Gjykatë Kushtetuese ky ligj shumë lehtë mund të rrëzohet sepse diskriminon një kategori të caktuar”, tha Demhasaj në emisionin “Këndi i Debatit”.
Ai tutje tha se në këtë kohë krize që tanimë Kosova po ballafaqohet, është shumë e vështirë që një veteran ta kalojë muajin lehtë vetëm me 170 euro.
“Pra në praktikë shihet se ky ligj nuk është në funksion, ndërlidhja e pagës minimale me pagesën e veteranëve ekziston në praktikë, mirëpo duke u bazuar te ligji praktik. Prandaj anashkalimi i veteranëve te kjo pjesë mendoj që është diskriminim, sepse është e padrejtë që atyre t’u japin 170 euro në muaj dhe të mos lejohen të mbajnë ndonjë punë. Pra, a mundet një veteran që nuk e ka asnjë të punësuar në familje, të mbesë gjallë në ditët e sotme vetëm me 170 euro në muaj”, tha ai në Tëvë1.