I dërguari special i SHBA-së, Steve Witkoff, do të takohet me kreun e këshillit të sigurisë kombëtare të Ukrainës, Rustem Umerov, për bisedime në Miami të enjten, ka konfirmuar Shtëpia e Bardhë, raporton Guardian.
Witkoff kaloi pothuajse pesë orë me presidentin rus Vladimir Putin në Moskë të martën, bisedime të cilat Trump i quajti “mjaft të mira” porse ishte shumë herët të flitet për rezultate konkrete.
Kurse, Putini më vonë tha se arritja e një konsensusi nuk do të ishte një “detyrë e lehtë”, duke theksuar kërkesën e përsëritur të Moskës që trupat ukrainase të tërhiqen nga rajoni i Donbasit – një zonë e pushtuar nga forcat ruse.
Të enjten, media shtetërore ruse raportoi se Putini tha: “Gjithçka varet nga kjo. Ose i çlirojmë këto territore me forcën e armëve, ose trupat ukrainase do të largohen nga këto territore dhe do të ndalojnë së luftuari atje.”
Bisedimet SHBA-Rusi në Kremlin pasuan disa ditë takimesh të SHBA-së me udhëheqës ukrainas dhe evropianë, të cilët diskutuan mbi draftin e marrëveshjes së propozuar nga pala amerikane, që gjerësisht cilësohej se anonte nga kërkesat e Rusisë.
Kievi dhe partnerët e tij evropianë besojnë se, edhe në rast të një marrëveshjeje paqeje, mënyra më efektive për të penguar Rusinë të sulmojë përsëri në të ardhmen do të ishte t’i jepej Ukrainës anëtarësimi në NATO.
Rusia është kategorikisht kundër një propozimi të tillë, dhe edhe Trump ka sinjalizuar vazhdimisht se nuk ka ndërmend ta lejojë Kievin të anëtarësohet në aleancë.
Sipas Kremlinit, perspektiva e anëtarësimit të Ukrainës në NATO ishte një “çështje kyçe” që u trajtua në Moskë të mërkurën.
