Mbrojtësi i Shqipërisë, Ardian Ismajli ka gjasa të mëdha që të jetë gati për ndeshjen kundër Milanit, ekip me të cilin do të përballet Torino në kuadër të xhiros së 14-të në Serie A.
Ismajli i ka munguar Torinos në dy ndeshjet e fundit kampionale, humbjet nga Como e Lecce, ndërsa në klub po shpresojnë që ai të jetë gati për Milanin.
Thuhet se Ismajli po bën të pamundurën që ti bashkohet grupet në stërvitje, pasi deri të mërkurën ka punuar individualisht dhe mjekët e klubit po e monitorojnë rikuperimin e tij.
Gjasat janë të mira që ai të luajë kundër Milanit, ndeshje kjo që Torino e luan në shtëpi të hënën prej orës 20:45.
Ismajli është shumë i rëndësishëm për mbrojtjen e Torinos dhe trajneri Marco Baroni po shpreson ta ketë në dispozicion 29-vjeçarin për këtë ndeshje.
Këtë sezon, Ismajli ka tetë paraqitje në Serie A me fanellën e Torinos, ekip që iu bashkua gjatë verës si lojtar i lirë pasi i skadoi kontrata me Empolin.
