Trajneri kroat, Jeronimo Sharin, ka debutuar me fitore në krye të skuadrës suharekase, Golden Eagle Ylli.
Në ndeshjen e xhiros së tetë, të zhvilluar të mërkurën mbrëma në palestrën “13 Qershori” në Suharekë, Golden Eagle Ylli fitoi 96:88 ndaj Sigal Prishtinës që ishte vendëse.
Për suharekasit ishte vetëm fitorja e dytë në këtë edicion, ndërsa i ka edhe gjashtë humbje. Prishtinasit e pësuan disfatën e katërt.
“Bardhekaltrit” e nisën më mirë ndeshjen, por në pushim, “verdhezinjtë” shkuan me pesë pikë epërsi, 46:41.
Me rezultatin 28:26 përfundoi periudha e tretë dhe Sigal Prishtina u afrua në tri pikë.
Por, Golden Eagle Ylli nuk e lëshoi epërsinë e krijuar për të fituar në fund me tetë pikë dallim.
Joseph Reece i kishte statistikat më të mira në fitoren e Golden Eagle Yllit, me 21 pikë, katër kërcime e një asistim.
Pikë dyshifrore patën edhe Antwan Scott me 16, Lis Shoshi 14 pikë, Erjon Kastrati 12 pikë dhe Lovre Bashiq 11 pikë të tjera.
Dion Haxhosaj te Sigal Prishtina pati 16 pikë, shtatë kërcime e tri asistime, por të pamjaftueshme për ta shmangur disfatën.
