Sekretari i NATO-s, Mark Rutte pas takimit të ministrave të Jashtëm të vendeve anëtare, ka thënë se janë pajtuar që mbështetje për Ukrainën në përballje me Rusinë do të vazhdojë.
Ai ka thënë është diskuar për zotimin e planit për të investuar 5% të Bruto Produktit Vendor në mbrojte çdo vit, ku mbështetje për Ukrainën llogaritet brenda këtij objektivi.
“Ministrat diskutuan një plan që është në zhvillim e sipër për të përcaktuar një rrugë të besueshme drejt zotimit të bërë në Hagë për të investuar 5% të BPV-së çdo vit në mbrojtje. Kjo do të sigurojë që ne të zhvillojmë dhe prokurojmë kapacitetet thelbësore për mbrojtjen tonë kolektive, përfshirë sistemet e avancuara për mbrojtjen ajrore. Ne ritheksuam se mbështetja për Ukrainën llogaritet brenda këtij objektivi prej 5%, pasi kontribuon drejtpërdrejt në sigurinë tonë”, tha Rutte pas takimit raporton Tëvë1.
Ai tha se vendet anëtare ndanë përditësime mbi planet e tyre kombëtare, “duke theksuar se si rritja e shpenzimeve po shndërrohet në veprime konkrete, si forcimi i trupave në krahun lindor dhe modernizimi i pajisjeve”.
Rutte tha se mbështet fuqishëm përpjekjen e Trump për të sjell paqen në Ukrainë.
“Kjo është jetike për zgjidhjen e këtij konflikti dhe për të mbështetur Shtetet e Bashkuara në drejtimin e këtij procesi. Dhe ndërsa vazhdojnë negociatat, ne nuk mund të lëkundemi në angazhimin tonë ndaj Ukrainës. Çdo ditë, raketat dhe dronët rusë shkaktojnë vdekje dhe shkatërrim, duke i lënë civilët pa ngrohje, dritë dhe ujë ndërsa afrohet dimri”, u shpreh ai.
