Angazhim më i madh për Ballkanin Perëndimor i është kërkuar administratës së presidentit Donald Trump në diskutimet që u mbajtën në Komitetin për Punë të Jashtme të Dhomës së Përfaqësuesve në Shtetet e Bashkuara.
Në hapje të seancës dëgjimore, kryetari republikan i Nënkomitetit për Evropën, Keith Self, ka përmendur edhe marrëdhëniet midis Kosovës dhe Serbisë, duke thënë se problemi mes dy vendeve është nxitësi kryesor i paqëndrueshmërisë rajonale, për çka, siç tha ai, i mundëson Rusisë ta minojë Bashkimin Evropian dhe aftësinë e NATO-s për t’i fuqizuar vendet e Ballkanit.
Ai u shpreh i bindur se një angazhim më i madh amerikan në Ballkan do ta afronte rajonin me anëtarësimin në Bashkimin Evropian.
“Nëse duam të kufizojmë ndikimin politik të Moskës, duhet të adresojmë varësinë e Serbisë nga energjia ruse. Vendet e NATO-s në Ballkan duhet të punojnë së bashku për të ndërtuar pengesa ushtarake dhe politike për të promovuar stabilitet, paqe dhe prosperitet të qëndrueshëm”, tha ai./RTK/
