Mesfushori Ylber Ramadani nuk po nderon vetëm skuadrën e Lecces, por edhe veten me paraqitjet e tij të shkëlqyera deri më tani në këtë sezon të kampionatit italian.
Me një fjalë, Ramadani është shndërruar në njërin prej mesfushorëve kyç të trajnerit Eusebio Di Francesco tek Lecce.
Përkthyer në statistika zyrtare, del se Ramadani është futbollisti që ka përshkruar më së shumti kilometra gjatë 13-të xhirove të para në Serie A.
Në total, Ramadani ka vrapuar 151.7 kilometra dhe bindshëm i prinë listës së vrapuesve në Serie A, duke lënë pas vetes Giovanni Di Lorenzon e Napolit me 148.8 kilometra dhe Jesper Karlstromin e Udineses me 147.7 kilometra të vrapuara.
Në 13 paraqitje kampionale, Ramadani ka regjistruar 1144 minuta lojë për Leccen, ekip me të cilin ka kontratë deri në fund të sezonit aktual.
