Golden Eagle Ylli kërkon fitoren e dytë këtë sezon në Superligën e Kosovës në basketboll, që do të ishte edhe debutim pozitiv për trajnerin Jeronimo Sharin.
Sharin, tashmë është zyrtarizuar si trajner i Yllit dhe në krye të ekipit nga Suhareka do të debutojë kundër Sigal Prishtinës, ish-ekipit të tij.
Dueli mes Sigal Prishtinës dhe Yllit, luhet sot në Suharekë prej orës 18:45 dhe pritet të jetë i fortë dhe interesant.
Ylli ka 1 fitore karshi gjashtë humbjeve, ndërsa Prishtina në 7 xhirot e para ka regjistruar 4 fitore e 3 humbje.
Fitoren e dytë sezonale, gjithashtu sot dhe në orarin e njëjtë, do ta kërkojë edhe skuadra e Borës, e cila do të jetë mysafire e Rahovecit 029.
Borës në këtë ndeshje do t’i debutojnë dy amerikanët Alex Hunter e Chris Payton kurse te Rahoveci 029, debutimin do ta bëjë AJ Patty.
Për dallim prej Borës që ka vetëm një fitore deri më tani, skuadra Rahoveci 029 që po debuton në elitën e basketbollit kosovar, ka regjistruar 3 fitore e 4 humbje.
