Kryetari i Partisë së Drejtësisë, Ferid Agani, ka komentuar situatën politike në vend, duke folur për rolin e opozitës, Kuvendin dhe mundësinë e formimit të qeverisë së re. Këtë ai e tha në emisionin “Këndi i debatit” në Tëvë1.
Agani vlerësoi se edhe opozita ka kontribuar në komplikimin e situatës aktuale.
“Unë mendoj që edhe opozita ka bërë problem serioz, sepse ka mundur të shkurtuohej me një veprim të unifikuar të opozitës. Në këtë rast, mund të ishte arritur që partia në pushtet të vinte më herët në situatë për të deklaruar nëse mund të formohej qeveria apo jo. Kur erdhi puna për të marrë mandatin, si partia e tretë – në këtë rast PDK-ja – u tërhoqën të gjithë dhe nuk e morën përgjegjësinë për të themeluar qeverinë. Përfundimisht, LDK-ja ka qenë partia e parë që propozoi unitet politik dhe për të stabilizuar situatën,” tha ai.
Ai gjithashtu theksoi se gabime ka pasur nga të dyja palët.
“Unë them se ka pasur gabime në të dy anët për situatën aktuale të vendit,” shtoi Agani.
Sa i përket qeverisë së re, Agani shprehu bindjen se LDK-ja do të jetë bartëse e saj dhe se procesi do të ndihmohet edhe nga institucionet ndërkombëtare.
“Unë jam thellësisht i bindur se LDK-ja do të jetë bartëse e qeverisë dhe se ky proces do të ndihmohet edhe nga partnerët ndërkombëtarë, për të bërë që të formohet qeveria dhe institucionet. Të gjithë do të ndryshojnë qëndrim dhe nuk do të tolerohet një situatë e tillë, dhe këtë nuk do ta lejojnë subjektet politike,” ka thënë Agani.
