Ushtria izraelite pretendon se ka vrarë 40 anëtarë të Hamasit të cilët ishin ngujuar në Rafah, në pjesën jugore të Rripit të Gazës, javën e kaluar.
Ushtria ka thënë në një deklaratë të dielën vonë se ka vazhduar të intensifikojë përpjekjet për të shkatërruar tunelet e mbetura në lindje të Rafah për të eliminuar militantët brenda.
“Javën e kaluar, më shumë se 40 militantë u eliminuan brenda tuneleve,” tha ushtria në një deklaratë, citon Anadolu.
Sipas raportimeve të mediave izraelite, rreth 200 luftëtarë të Hamasit janë të bllokuar brenda tuneleve nëntokësore në Rafah, dhe Tel Avivi ende nuk i është përgjigjur kërkesave të Hamasit dhe ndërmjetësve për t’u lejuar atyre kalimin e sigurt në zonat nën kontrollin e grupit.
Qyteti i Rafah ndodhet brenda zonës së verdhë, një zonë ende e pushtuar nga ushtria izraelite brenda Rripit të Gazës.
Një marrëveshje armëpushimi e ndërmjetësuar nga Egjipti, Katari dhe Turqia dhe e mbështetur nga SHBA-të hyri në fuqi më 10 tetor midis Izraelit dhe Hamasit në Rripin e Gazës.
Izraeli ka vrarë më shumë se 70,000 njerëz, kryesisht gra dhe fëmijë, dhe ka plagosur gati 171,000 të tjerë në sulmet në Gaza që nga tetori i vitit 2023.
