Pas ceremonisë përkujtimore në Pallatin e Kulturës në Tetovë, këngëtari i ndjerë Shpat Kasapi u përcoll për në banesën e fundit, i shoqëruar nga një numër jashtëzakonisht i madh njerëzish.
Qytetarë, familjarë, miq, kolegë të skenës dhe admirues të muzikës së tij u bashkuan në kortezhin mortor, duke ecur në heshtje dhe me lot në sy pas arkëmortit të mbuluar me flamurin kombëtar.
Rrugët e Tetovës u mbushën me njerëz që kishin dalë për t’i dhënë lamtumirën e fundit artistit 40-vjeçar, i cili u nda papritur nga jeta.
Në varrezat e qytetit, ku u bë edhe ceremonia e varrimit, u dëgjuan lutje dhe fjalë ngushëllimi, ndërsa dhjetëra persona vazhduan të derdhnin lot për humbjen e papritur të këngëtarit.
Shpati u varros mes një dhimbjeje të madhe kolektive, duke lënë pas kujtime që do të mbeten gjatë si te familjarët dhe të afërmit, ashtu edhe tek publiku që e ka dashur për vite me radhë./TopChannel
