Policia e Shqipërisë ka sekuestruar 1.2 kilogramë kanabis, 405 gram tritol, 51 kapsolla detonatore, 5 metra fitil zjarrpërcjellës, municion luftarak dhe një sasi lekësh, të cilat dyshohet se kishin destinacion Kosovën.
Si rezultat i operacionit policor të koduar “Varkëtari”, u arrestua në flagrancë shtetasi L. P., 29 vjeç, banues në Pukë.
Ai u kap në fshatin Dushaj duke lëvizur me një automjet tip “Volkswagen”, në të cilin kishte fshehur lëndët narkotike dhe eksplozivin.
Sipas Policisë, materialet dyshohet se ishin transportuar me varkë nga fshati Apripë, Pukë, drejt Tropojës, ku autori kishte parkuar automjetin për të shmangur kontrollin e Policisë.
Operacioni u organizua nga shërbimet e DVP Kukës, në bashkëpunim me Komisariatin e Policisë Tropojë dhe me mbështetjen e Forcës së Posaçme “Shqiponja”, bazuar në informacionet operative mbi planin e transportit drejt Kosovës.
“Në bashkëpunim me Prokurorinë dhe me homologët e Kosovës vijon puna për zbardhjen dhe dokumentimin e plotë ligjor të këtij rasti, me qëllim identifikimin dhe kapjen e personit që do t’i blinte në Kosovë. Materialet procedurale i kaluan Prokurorisë, për veprime të mëtejshme”, thuhet në njoftim.
