“Nuk kanë ba diçka hyzmet, me shku me i vet k’ta që kanë mbijetu, çka kanë përjetu. S’ka bo kurrfarë interesimi për ta.”, është shprehur axha i Behar Topillës.
Mungesën e marrjes së dëshmisë nga Behar Topilla për masakrën e Sharavinës, e theksoi familjari i tij pak ditë pas vdekjes së tij.
Behar Topilla ishte i mbijetuari i vetëm i masakrës së Sharavinës, ku u vranë mbi 40 civilë shqiptarë.
Për këto krime dhe përjetimet e tij në luftën e fundit, nuk arriti të dëshmonte para organeve të drejtësisë.
Mirëpo, Behar Topilla, nuk llogaritet të jetë dëshmitari i vetëm i krimeve të luftës, që nuk arriti ta bënte rrugën deri tek organet e drejtësisë.
“Në rastet e krimeve të luftës, prova kryesore është deklarata e dëshmitarit. Pra, lufta e Kosovës apo procest gjyqësore kryesisht bazohen tek deklaratat e dëshmitarëve okularë apo deklaratat e dëshmitarëve rrethanorë. 26 vite pas përfundimit të luftës, qindra apo mijëra dëshmitarë të cilët i kanë mbijetuar masakrave e krimeve të luftës, tanimë kanë ndërruar jetë. Dhe sigurisht që kjo është njëra prej sfidave kryesore”, ka thënë Alija.
Për kategorinë e dëshmitarëve të luftës, që janë dëshmitarë okularë të krimeve serbe, kërkohet që të shfrytëzohet mundësia e veçantë e hetimit, në mënyrë që të mos humbet mundësia e dëshmisë së tyre.
“Një mundësi e veçantë hetimi sipas nenit 147 të Kodit të Procedurës Penale, ku ka rrezik potencial në vdekjen e dëshmitarit, atëherë në fazën paraprake, me kërkesë të palës, mund të bëhet një mundësi e veçantë hetimi ku natyrisht duhet të jenë prezent palët, prezenca e të cilëve është e detyrume, në mënyrë që m’i paraqit pikëpamjet, argumentet dhe versionet e tyre në raport me deklaratat e dëshmitarëve. Dhe kur këto bëhen, atëherë natyrisht se një deklaratë e tillë mund të konsiderohet provë e pranueshme edhe në procesin e shqyrtimit gjyqësor”, është shprehur Bajraktari.
Aktualisht, janë duke u zhvilluar disa gjykime për krimet e luftës në Kosovë.
