Dusan Vlahovic ishte një nga transferimet më të bujshme të merkatos së janarit me serbin që kaloi nga Fiorentina në radhët e Juventus për shifrën e 70 milionë eurove.
Pritshmëritë për sulmuesin janë tejet të larta, ndërsa 22-vjeçari kishte oferta të shumta dhe një nga më konkretet ishte pista Arsenal. Së fundmi, Vlahovic ka treguar se me klubin anglez nuk ka komunikuar asnjëherë dhe se e kishte mendjen vetëm te Juventus pasi bardhezinjtë i përshtaten edhe mentalitetit të tij.
“Sa i takon ofertës së Arsenal, atë ndoshta e di vetëm agjenti im. Unë nuk kam folur në asnjë moment me klubin anglez. Në mendjen time ishte vetëm Juventus, unë jam i nderuar që vesh fanellën e bardhezinjve.
Është një emocion i madh sa herë zbres në fushë dhe përfaqësoj këtë klub. Unë identifikohem me ADN e Juventusit dhe personaliteti im përshtatet me atë të klubit. Kur vjen te Juventus nuk dorëzohesh në asnjë moment, lufton dhe sakrifikon. Kjo është pikërisht ajo që kërkoj unë. Idhuj? Më pëlqen mentaliteti i Michael Jordan dhe Novak Djokovic, i cili vjen nga Serbia dhe është numri një në botë. E kam admiruar gjithnjë, ndonjëherë nuk arrij të kuptoj sim und të arrij aq shumë rezultate. Është kampion dhe ka një mentalitet që i lejon të përballojë ccfarëdo vështirësie”, u shpreh Vlahovic
