Deputetja e Lidhjes Demokratike të Kosovës, Hykmete Bajrami, ka reaguar ashpër pas vendimit të Qeverisë në detyrë për ndarjen e mjeteve financiare për pagat e punëtorëve të Radio Televizionit të Kosovës, të cilët për një muaj nuk kishin marrë pagat, duke organizuar protesta dhe greva.
Bajrami ka fajësuar ekzekutivin se po krijon qëllimisht kriza dhe se zgjidhjen e ofron vetëm pasi situatat përshkallëzohen.
“E kemi thënë prej ditës së parë: këta vetë janë prodhues të krizave. I lanë një muaj pa paga punëtorët e RTK-së, me protesta e greva dhe në fund jo Kuvendi po këta uzurpatorët e Qeverisë paskan gjetë zgjidhje, me 28 ditë vonesë”, ka shkruar Bajrami në Facebook.
Ajo e ka akuzuar kryeministrin në detyrë, Albin Kurti, se po mban qytetarët të varur nga vendimet e tij dhe se po inskenon situata për të dalë më pas si “shpëtimtar”.
“Albin Kurti me klikën e tij jeton duke shkaktuar kriza, duke i bë njerëzit me vuajtë, duke i mbajtur qytetarët të varur nga vendimet e tij, e pastaj me dalë si shpëtimtar, por ranë maskat”, ka shtuar ajo.
Deputetja e LDK-së i bëri thirrje qeverisë të ndalojë bllokadat dhe të ulet me Komunën e Prishtinës për të gjetur zgjidhje për çështjet e hapura.
“Ndalni bllokadat, tash uluni me Komunën e Prishtinës dhe gjeni zgjdhje! Qytetarët paguajnë taksa për me marrë shërbime, jo për me u maltretu nga inskenimet e mashtrimet tuaja”, ka theksuar ajo.
Në fund, Bajrami ka paralajmëruar se më 28 dhjetor, sipas saj, qytetarët do të japin përgjigjen ndaj keqmenaxhimit të qeverisë aktuale.
“28 dhjetori do të jetë dita kur do të merrni përgjgijen për krejt këtë keqtrajtimin që po u bëni qytetarëve”, ka përfunduar ajo.
