Zëvendësministri në detyrë i Drejtësisë nga radhët e LVV -së Vigan Qorrolli, ka thënë se në zgjedhjet e jashtëzakonshme parlamentare të 28 dhjetorit presin të marrin mbështetje të madhe popullore.
Ai ka thënë se pritjet e tyre janë që jo vetëm t’i fitojnë zgjedhjet por t’i formojnë institucionet në mundësinë e parë.
“Po presim si asnjëherë më parë që ta kemi mbështetjen popullore, ta fitojmë besimin qytetar i cili do të na jap mundësinë që jo vetëm t’i fitojmë zgjedhje por edhe t;i krijojmë institucionet në rrethanën e parë të mundshme”, tha Qorrolli në emisionin “Këndi i Debatit” në Tëvë1.
Ai ka akuzuar ish-partitë opozitare për siç ka thënë ai, bllokim të formimit të institucioneve që si pasojë tash vendi do të shkojë në zgjedhje të reja parlamentare.
“Opozita pengoi me manovrat e saja politike duke mos qenë e gatshme të hyjë në radhë të parë me një marrëveshje politike, ku ne kemi bërë të qartë se të gjitha partitë janë të mirëseardhura përveç PDK-së, dhe që të gjitha kanë refuzuar në bllok një marrëveshje politike me ne për t’i vënë vendit qeveri. Kjo nënkupton që ata kanë qenë bllokues për t’i dhënë vendit së pari Kuvendin dhe më pas nuk kanë pasur gatishmëri politike për të pasur një qeveri me kryeministër Albin Kurtin. Nuk e deshën, as z. Konjufca dhe pastaj po shkojmë në zgjedhje”, tha Qorrolli.
