Policia e Kosovës ka arrestuar E.M. (32 vjeç), i cili ishte shpallur në kërkim për disa vepra penale, përfshirë kanosje, posedim të narkotikëve, lëndim të rëndë trupor dhe vrasje të mbetur në tentativë.
Arrestimi u realizua pas një ankese të një qytetari, i cili raportoi se i dyshuari e kishte kanosur. Sipas policisë, rreth orës 13:30, E.M. shkoi te shtëpia e qytetarit së bashku me një të afërm, dhe gjatë tentativës për t’u larguar me një veturë tip “Pick-up” nxori armë zjarri dhe u arratis drejt zonës malore të fshatit Zborc.
“Njësitë policore arrestuan fillimisht M.M. (43 vjeç), i cili dyshohet se e kishte ndihmuar të arratisej. Më pas, me vendosjen e policisë në pika strategjike në fshatin Carralevë, u arrit lokalizimi dhe arrestimi i E.M.-së, pa rrezikuar pjesëtarët e policisë. Gjatë kontrollit, tek i dyshuari u gjet dhe u sekuestrua një armë zjarri me disa fishekë,” thuhet në raportin e Policisë.
Policia bëri të ditur se E.M. ishte në kërkim për veprat: posedim të narkotikëve (Gjykata Themelore në Prishtinë), lëndim të rëndë trupor (Gjykata Themelore në Ferizaj) dhe vrasje të mbetur në tentativë (Sektori Rajonal i Hetimeve në Ferizaj).
Komandanti i stacionit policor udhëhoqi operacionin, ndërsa dy të arrestuarve iu caktua masa e ndalimit prej 48 orësh.
