Forca e Sigurisë së Kosovës (FSK) ka ftuar qytetarët të marrin pjesë në “Ditën e Hapur”, e cila organizohet me rastin e Ditës së Forcës më 27 Nëntor, nga ora 09:00 deri në 14:00.
Në kazermën “Adem Jashari” në Prishtinë, nga ora 09:30 do të jenë të pranishëm udhëheqësit e lartë shtetërorë, mysafirë dhe ambasadorë të vendeve mike.
Qytetarët janë të mirëseardhur të vizitojnë kazermat e FSK-së në Prishtinë, Prizren, Pomozotin, Istog, Ferizaj, Mitrovicë dhe Gjilan.
Gjatë vizitës, të pranishmit do të kenë mundësi të njohin dhe të shohin kapacitetet ushtarake të Forcës së Sigurisë së Kosovës, të cilat do të jenë të ekspozuara si pjesë e aktiviteteve festive për Ditën e Forcës.
