Basketbollisti i Trepçës, amerikani Chad Brown është shpallur më i miri për javën e shtatë të Superligës së Kosovës.
Të hënën, Federata e Basketbollit të Kosovës (FBK), ka bërë të ditur se amerikanit Brown i ka takuar çmimi “MVP” i javës pasi udhëhoqi ekipin e tij drejt fitores në derbin e xhiros.
Trepça e mposhti Sigal Prishtinën në udhëtim, ndërsa Brown regjistroi “double-double” me 11 pikë e 16 kërcime, duke shtuar edhe 3 asistime.
Qendra Brown është përfshirë edhe në ekipin më të mirë të javës, që ndryshe njihet si Top-5, të cilin e përbëjnë edhe dy lojtarë të Rahovecit 029 dhe nga një i Bashkimit e Pejës.
Julian Roche pati 22 pikë e 13 kërcime, ndërsa Isiah Umipig shtoi 14 pikë, 4 kërcime e 10 asistime në fitoren e Rahovecit 029 kundër Golden Eagle Yllit.
Isiah Cousins i Bashkimit regjistroi 20 pikë, 7 kërcime e po aq asistime në triumfin ndaj Borës, ndërsa Top-5 e javës mbyllet me Tajh Green të Pejës që në fitoren kundër Vëllaznimit kishte 14 pikë e 13 kërcime.
