Izraeli vrau të dielën zyrtarin më të lartë ushtarak të Hezbollahut, Ali Tabtabai, në një sulm ajror në periferin jugore të Bejrutit.
Kjo është goditja e parë në këtë zonë pas muajsh, pavarësisht armëpushimit të ndërmjetësuar nga SHBA një vit më parë.
Ushtria izraelite e identifikoi Tabtabain si shefin e përkohshëm të shtabit të Hezbollahut. Grupi libanez konfirmoi vdekjen e tij, duke e përshkruar si “komandantin e madh xhihadist” që “punoi për t’u përballur me armikun izraelit deri në momentin e fundit të jetës së tij të bekuar”.
Zyrtari i Hezbollahut, Mahmoud Qmati, deklaroi nga vendi i sulmit në Haret Hreik se Izraeli kishte kaluar një “vijë të kuqe”, duke shtuar se udhëheqja e grupit do të vendosë nëse dhe si do të përgjigjet.
Ministria e shëndetësisë së Libanit njoftoi se gjatë sulmit mbeten pesë të vdekur dhe 28 të plagosur. Sulmi goditi një ndërtesë shumëkatëshe, duke hedhur mbeturina mbi rrugën kryesore dhe duke shkaktuar panik tek banorët, sipas Reuters.
Tabtabai ishte sanksionuar nga SHBA në vitin 2016, dhe për informacion mbi të ishte ofruar një shpërblim prej deri në 5 milionë dollarësh.
Presidenti libanez Joseph Aoun kërkoi ndërhyrje ndërkombëtare për të ndalur sulmet izraelite.
Armëpushimi i nëntorit 2024 synonte t’i jepte fund një viti luftime mes Izraelit dhe Hezbollahut, por Izraeli ka vazhduar sulmet pothuajse çdo ditë.
I pyetur nëse Izraeli e kishte njoftuar SHBA-në përpara se të kryente sulmin, zëdhënësi i qeverisë izraelite, Shosh Bedrosian, tha se Izraeli merr vendime në mënyrë të pavarur.
Hezbollahu nuk ka qëlluar ndaj Izraelit që prej fillimit të armëpushimit.
