Të mërkurën dështoi të miratohet projektligji për buxhetin e vitit 2026.
Kjo për shkak se partitë e ish bllokut opozitar refuzuan të marrin pjesë në seancë e thirrur nga Kuvendi në lidhje me këtë çështje, duke e konsideruar si të kundërligjshëm.
Moskalimi i buxhetit për vitin 2026 sipas Odës Ekonomike do të ketë edhe pasoja ekonomike.
Mirëpo sipas kryetarit të Odës, Lulëzim Rafuna ekziston mundësia që deri në muajin mars të shfrytëzohet buxheti i vitit 2025.
“Sa i përket shpenzimeve operative, Ligji për Financa e thotë shumë qartë se në muajin janar do të përdoret 1/12 e vitit 2025 e poashtu edhe në shkurt. Sfida do të jetë në muajin mars nëse nuk do të kemi Kuvend, pasi në muajin mars nuk mund të bëhen pagesat me përjashtim të pagesave që kemi obligim ndërkombëtar, kreditë dhe interesat që janë pranë institucioneve ndërkombëtare financiare. Kurse brenda të gjitha pagesat do të ndalen”, deklaroi Rafuna.
Rafuna ka treguar se kush do të preket pas muajit mars.
“Nga këto pagesa nuk do të përfitojnë shërbyesit civil, të gjithë 83 mijë shërbyes civil, nuk do të përfitojnë veteranët, pensionistët, të gjithë ata që marrin mjete nga buxheti i shtetit me një fjalë, kurse sa i përket sektorit privat ata do të vazhdojnë të paguajnë tatime, por qëllimi i tatimeve është që të kthehen në të mira publike por në këtë rast nuk po kthehen në të mira publike”.
E profesori, Mazllum Baraliu ka treguar hapat ligjor për shfrytëzimin e buxhetit të vitit 2025.
“Ka atje mundësi që presidentja e vendit ta bëjë meqenëse ajo është në funksion, ta bëjë zgjatjen e buxhetit dhe tash eventualisht do të duhej të reagonte ajo ta gjejë mënyrën dhe vakuumet e mundshme ligjore që ta bëjë këtë për të mos ndodhur kjo që po ndodh. E dyta ekziston poashtu mundësia me ligjin për buxhetin që nga mjetet e vitit 2025 të shfrytëzohen pagesat dhe funskionalizohet çdo gjë që duhet të funksionalizohet që të bëhet më 31 mars e deri atëherë ish dashur të formohet qeveria e re”.
Qeveria në detyrë e Kosovës në muajin tetor e ka miratuar buxhetin për vitin 2026 të i cili kap një shifër prej rreth 4 miliardë euro.
