Të enjten, në ambientet e Akademisë së Kosovës për Siguri Publike (AKSP) në Vushtrri, u mbajt ceremonia e certifikimit të 15 operatorëve të rinj të Drejtorisë për Mbrojtje të Afërt.
Sipas Policisë, operatorët kanë përfunduar një trajnim intensiv dhe sfidues prej 680 orësh, i cili përfshinte pjesën teorike dhe praktike.
Gjatë trajnimit janë testuar shkathtësitë fizike, taktikat mbrojtëse, artet marciale, gjuajtja me armë të ndryshme, orientimi në natyrë, lëshimi me litar, mbijetesa në ujë, si dhe vozitja taktike në kushte të ndryshme.
Certifikatat përkatëse u ndanë nga Drejtori i Përgjithshëm i Policisë së Kosovës, kolonel Gazmend Hoxha, së bashku me drejtorët e departamenteve përkatëse dhe u.d. Drejtori i Përgjithshëm i AKSP-së, Shpend Shabani.
Në fjalën e tij, drejtori Hoxha i uroi operatorët për suksesin e treguar gjatë trajnimit dhe i inkurajoi të ruajnë disiplinën dhe përkushtimin në realizimin e detyrave të tyre profesionale.
