28 dhjetori është data për zgjedhje të jashtëzakonshme parlamentare.
Këtë datë e ka vendosur shefja e shtetit, Vjosa Osmani pas nënshkrimit të dekretit presidencial për shpërndarje të Kuvendit të Kosovës.
Presidentja Osmani që këtë vendim e mori pas takimit me liderët e partive politike, e arsyetoi kështu.
“21 dhe 28 dhjetor janë datat që mund të bëhen sipas Kushtetutës. Tetë parti janë deklaruara për datën 28, pesë parti për datën 21 dhe 3 parti për cilën do datë. Data 28 dhjetor kam vlerësuar që mbetet data e vetme e mundshme, edhe pse kjo datë do të ketë edhe sfida për KQZ-në”, tha Osmani.
E këtë datë si preferencë e kanë dhënë Lëvizja Vetëvendosje.
Andaj Osmani u pyet se a po i përshtatet linjës së kryeministrit në detyrë dhe njëherit kryetarit të këtij subjekti, Albin Kurtit.
“Siç kanë thënë disa njerëz shumë para nesh e shumë më të mençur se ne: nëse askush nuk të akuzon për asgjë, atëherë nuk ke qëndruar për asgjë. Në vitin 2021 kur partia në pushtet që kishte më shumë se 50 për qind të votave kërkonin që unë ta shtyja datën e zgjedhjeve lokale dhe kishim një opozitë shumë më të vogël se që është sot, unë vendosja në favor të kërkesës së opozitës që mos të shtyhej data e zgjedhjeve lokale, sado që kisha të drejt kushtetuese a bëjë një gjë të tillë. Edhe pse e zgjodha datën e favorshme për opozitën prapë u akuzova se po koordinohem dhe po ia bëj qefin Kurti”, tha Osmani
Po ashtu, Osmani u pyet nëse “po i shërben Lëvizjes Vetëvendosjes” pasi zgjodhi 28 dhjetorin.
Presidentja duke e cilësuar këtë si pyetje “ofenduese”, tha se i siguron qytetarët që asnjë vendim nuk e merr pa vetëdije”, teksa shtoi se ka besim të plotë “që ky vendim është vetëm në interes të Kosovës”.
Tutje Osmani tha se propozoi që të mbahet edhe një seancë para shpërbërjes së institucionit legjislativ por nuk pati vullnet politik.
“Para se ta nënshkruaj dekretin për shpërndarje, kam bërë përpjekjen e fundit që partitë të rikthehen në Kuvend për të miratuar zgjatjet buxhetore, në mënyrë që as pagat e qytetarëve tanë dhe as funksionimi i shtetit të mos bllokohen. Po ashtu, në rend dite ishte edhe pakoja presidenciale prej pesë marrëveshjesh ndërkombëtare në vlerë prej 1 miliard euro dhe çështje të tjera të rëndësishme, për të cilat kisha shpresuar për vullnet politik”, tha ajo.
Ajo tha se ende nuk ka vendosur se a do të kandidoj edhe për nja mandat të ardhshëm, megjithatë tha që një gjë e din sigurt, që do vazhdoj shërbimin në institucionet publike.
“Paralajmërim që do të jem duke shërbyer në institucionet e Republikës së Kosovës se ku e si e vendosin qytetarët”
Ky vendim i presidentes për shkuarje në zgjedhje të jashtëzakonshme erdhi pasi mandatari i dytë i Lëvizjes Vetëvendosje, për formimin e qeverisë, Glauk Konjufca dështoi të formojë ekzekutivin të mërkurën.
