Prokuroria Themelore në Prizren, Departamenti i Krimeve të Rënda, ka ngritur aktakuzë kundër dy të pandehurve, Y.Rr. dhe B.K., për shkak të dyshimit të bazuar mirë se kanë kryer veprën penale “Dhënia ose marrja e ryshfetit në lidhje me votimin”.
Sipas aktakuzës, më 12 tetor 2025, në fshatin Budakovë të Suharekës, i pandehuri Y.Rr. dyshohet se i ka ofruar përfitim të pa merituar në shumën 120 euro të pandehurit B.K., me qëllim që ky i fundit të votojë në favor të kandidates për asamble komunale.
Për të verifikuar votimin, Y.Rr. dyshohet se i ka kërkuar B.K. të tregojë rezultatin në telefon dhe më pas i ka dorëzuar shpërblimin.
Ndërkaq, B.K. akuzohet se ka pranuar këtë përfitim me qëllim të ndikimit në votimin e tij.
Prokurori i çështjes ka propozuar që, pas shqyrtimit gjyqësor dhe administrimit të provave, të pandehurit të shpallen fajtorë dhe të dënohen sipas ligjit për veprën penale për të cilën akuzohen./teve1.info/
