Prokuroria Themelore në Ferizaj, Departamenti për Krime të Rënda, ka ngritur aktakuzë kundër të pandehurit me inicialet E.S., për shkak të dyshimit se ka kryer veprën penale “Vrasja në tentativë”.
Sipas aktakuzës, më 24 tetor 2025, rreth orës 19:55, pranë Stacionit të Autobusëve në rrugën “Driton Islami” në Ferizaj, pas një mosmarrëveshjeje të mëhershme, i pandehuri dyshohet se e ka goditur dy herë një të mitur me thikë në gjoks dhe krah, duke shkaktuar lëndime të rënda trupore.
Viktima u dërgua për trajtim në Qendrën Klinike Universitare të Kosovës, në Klinikën e Kirurgjisë Torokale.
Prokurori i çështjes ka propozuar që, pas shqyrtimit gjyqësor dhe administrimit të provave, i pandehuri të shpallet fajtor dhe të dënohet sipas ligjit për veprën penale për të cilën akuzohet./teve1.info/
