Kryetari i Aleancës për Ardhmërinë e Kosovës, Ramush Haradinaj, ka bërë të ditur se gjatë takimit të sotëm të liderëve politikë me presidenten e vendit, Vjosa Osmani, është nënshkruar dekreti për shpërndarjen e Kuvendit të Kosovës.
Pas takimit, Haradinaj ka deklaruar para mediave se me shpërndarjen e Kuvendit kanë nisur edhe afatet ligjore për caktimin e zgjedhjeve të jashtëzakonshme parlamentare.
Ai bëri të ditur se AAK ka propozuar datën 21 dhjetor për mbajtjen e zgjedhjeve.
“Sot u nënshkrua dekreti për shpërndarjen e Kuvendit të Kosovës. Nga ky moment fillon edhe koha për shpalljen e datës së zgjedhjeve të jashtëzakonshme parlamentare, sipas Ligjit për Zgjedhjet data duhet të jetë më së afërti 30 ditë dhe më së largu 40 ditë nga dita e sotme. Presidentja e ka diskrecionin e vendimit. Duke pasur parasysh se Kosovës i është humbur shumë kohë dhe ka akumulime buxhetore, në respekt të qytetarëve kemi propozuar 21 dhjetorin, me qëllim që të fitohet të paktën një javë kohë për proceset buxhetore që duhet të zhvillohen”, tha Haradinaj.
Haradinaj ka kritikuar propozimin e pushtetit për mbajtjen e zgjedhjeve më 28 dhjetor, duke e quajtur atë një ndërhyrje të panevojshme në periudhën e festave të fundvitit.
“Periudha para Vitit të Ri është shumë e çmuar për qytetarët tanë, jo vetëm për pushime por edhe për festime. Të shpallësh zgjedhje më 28 dhjetor dhe të vazhdosh me numërime e rezultate deri në Natën e Vitit të Ri është një arrogancë politike, madje deri në ofendim”, ka thënë Haradinaj.
Sipas tij, 21 dhjetori mbetet “data më e duhur dhe më racionale”.
Haradinaj ka theksuar se, pavarësisht datës që do të vendoset, AAK është e përgatitur për zgjedhje dhe do të garojë e vetme.
“Besojmë shumë se do ta ndihmojmë Kosovën me besimin dhe votën e qytetarëve”, është shprehur ai.
Duke folur për procesin paszgjedhor, Haradinaj paralajmëroi se nuk do të lejojë bllokada institucionale.
“E kam thënë edhe më herët: pas këtyre zgjedhjeve nuk do të kem tolerancë për askënd që bëhet pengesë për ecjen përpara në krijimin e institucioneve. Nëse opozita e merr besimin, duhet të përshpejtojmë kohën, sepse situata është mjaft serioze”, ka përfunduar ai./teve1.info/
