Zëvendëskryesuesja e Këshillit Prokurorial të Kosovës (KPK), Jehona Grantolli, ka propozuar shkarkimin e ushtruesit të detyrës së Kryeprokurorit të Shtetit, Besim Kelmendi, pas zhvillimeve të fundit që lidhen me intervistimin e tij nga Prokuroria Speciale në cilësinë e dëshmitarit për çështjen e masakrës së Reçakut.
Grantolli tha se Kelmendi nuk po përfaqëson më unitetin e sistemit prokurorial dhe kërkoi që në mbledhjen e KPK-së të futet pika për shkarkimin e tij.
“Duke pasur parasysh zhvillimet e fundit lidhur me detyrën e U.D. Besim Kelmendit, i cili është pozicionuar së fundmi me një grup të anëtarëve të Këshillit dhe më nuk përfaqëson unitetin e sistemit prokurorial… Kërkoj që kjo pikë të futet në mbledhje, me propozimin për shkarkimin e tij,” deklaroi ajo.
Në reagimin e tij, Kelmendi tha se propozimi i Grantollit është i motivuar dhe me prapavijë të qartë. Ai madje aludoi se deklarata e saj nuk është përgatitur prej saj.
“Ajo e lexoi propozimin, por nuk dihet kush ia ka shkruar. Ndoshta zëdhënësi i tyre në media… Nëse është dikush pjesë e grupeve, tregoni cili grup është,” tha Kelmendi.
Ai shtoi se po tentohet largimi i tij për t’i hapur rrugë një personi të “besueshëm” për një grup të caktuar brenda KPK-së.
“Kjo është e planifikuar që në këtë pozitë të vijë njeriu i atyre që po dëshirojnë të më shkarkojnë. Është një plan i tmerrshëm i një grupi për interesat e një individi. Është mëse e turpshme dhe joligjore,” u shpreh ai.
Pas të gjitha deklarimeve, Grantolli e akuzoi Kelmendin se po e fyen dhe i kërkoi të largohej nga salla, duke argumentuar se ai ndodhej në konflikt interesi.
Ndërkohë Kelmendi këmbënguli se “opinionit duhet t’i bëhet e qartë se gjithçka është e planifikuar”.
