Presidentja e Kosovës, Vjosa Osmani, priti dje në takim përfaqësues të Organizatës Japoneze të Tregtisë së Jashtme së bashku me disa prej kompanive më të njohura japoneze.
Gjatë takimit, Osmani vuri në dukje potencialin e madh për thellimin e marrëdhënieve ekonomike ndërmjet Kosovës dhe Japonisë, duke theksuar se Kosova ofron një fuqi punëtore të re, të aftë dhe konkurruese, si dhe një pozitë strategjike të favorshme për qasje në tregjet evropiane.
Në këtë kontekst, Presidentja prezantoi mundësitë e shumta për investime japoneze në sektorin e ICT-së, inovacionit, infrastrukturës, zhvillimit urban dhe projekteve të mëdha inxhinierike, ku bizneset japoneze mund të sjellin përvojën dhe teknologjinë e tyre të avancuar.
Në këtë frymë, Presidentja ftoi JETRO-n dhe kompanitë japoneze të eksplorojnë mundësitë për krijimin e partneriteteve të qëndrueshme dhe afatgjata me sektorin privat në Kosovë.
“Në përmbyllje, Presidentja Osmani ritheksoi interesimin e fuqishëm të Kosovës për hapjen e një zyre përfaqësuese të JETRO-s në Prishtinë, duke theksuar se një prani e tillë do të forconte ndjeshëm bashkëpunimin ekonomik dypalësh, do të lehtësonte identifikimin e projekteve dhe partnerëve potencialë për kompanitë japoneze dhe do të rriste rolin ekonomik të Japonisë në Ballkanin Perëndimor”, thuhet në njoftimin e Presidencës./teve1.info/
