Presidentja Vjosa Osmani ka deklaruar të hënën se vonesa nëntëmujor në procesin e krijimit të qeverisë nuk i takon asaj.
Në një prononcim për media, Osmani ka theksuar se këto vonesa as nuk i ka kërkuar, as përkrahur e as shkaktuar si presidente.
“Mos të harrojmë që janë vonesa nëntëmujore që nuk i kam kërkuar, as përkrahur e as shkaktuar unë si presidente. Kështu që 9 muaj i kemi pritur partitë politike, deputetët e Kuvendit. Kam shpresuar që do të bëjnë durim në këto dy javë”, ka thënë ajo.
Presidentja sqaroi se ftesa për seancën e Kuvendit për formimin e qeverisë do të bëhet brenda afateve kushtetuese.
Ajo gjithashtu theksoi se vlerësimi i mbështetjes në Kuvend do të kishte kuptim vetëm për dy kandidatët potencialë, për të përcaktuar cili ka më shumë gjasa.
Osmani bëri të ditur se procesi tashmë po i afrohet fundit dhe se shumë shpejt do të dihet sesi do të veprohet me hapat e ardhshëm drejt formimit të qeverisë së re.
