Me ftesë zyrtare të Zëvendëskryeministrit dhe Ministrit të Punëve të Jashtme të Italisë, Antonio Tajani, ministrja në detyrë e Punëve të Jashtme dhe Diasporës, Donika Gërvalla, ka udhëtuar drejt Romës për të marrë pjesë në Konferencën e parë Ndërkombëtare të Italofonisë, që do të zhvillohet më 17 dhe 18 nëntor 2025.
Kjo konferencë, e para e këtij formati, organizohet nga Ministria e Punëve të Jashtme të Italisë në bashkëpunim me Shoqatën “Dante Alighieri”, me synimin për të promovuar gjuhën italiane si mjet komunikimi, bashkëpunimi kulturor dhe afrimi ndërmjet popujve.
Siç bëhet e ditur në njoftim, në qendër të diskutimeve do të jenë temat e identitetit të përbashkët kulturor, dialogut ndërkulturor, paqes, zhvillimit ekonomik dhe diplomacisë kulturore.
Italofonia pritet të prezantohet si një platformë e re për zhvillim dhe rritje ekonomike, përmes forcimit të lidhjeve midis institucioneve, shoqërive civile dhe komuniteteve italofone në mbarë botën.
“Pjesëmarrja e Ministres Gërvalla në këtë nismë vjen në kuadër të marrëdhënieve të shkëlqyera kulturore dhe miqësore me Italinë, si dhe angazhimit të vazhdueshëm për promovimin e dialogut ndërkombëtar”, thuhet në njoftimin zyrtar të MPJD-së.
Gjatë qëndrimit në Romë, Gërvalla pritet të theksojë edhe rolin e rëndësishëm të mërgatës shqiptare në Itali, e cila shërben si një urë kulturore dhe gjuhësore që forcon bashkëpunimin dypalësh dhe kontribuon në afrimin e rajonit me Italinë./teve1.info/
