Enver Hoxhaj nga Partia Demokratike e Kosovës ka publikuar pamje nga protesta e organizuar sot nga Organizata e Veteranëve të Luftës së Ushtrisë Çlirimtare të Kosovës (OVL-UÇK), që po zhvillohet para Asamblesë Parlamentare të Këshillit të Europës në Strasburg.
Protestuesit po kërkojnë lirimin e ish-krerëve të UÇK-së, të cilët po gjykohen nga Gjykata Speciale.
Në një videomesazh të postuar në Facebook, Hoxhaj ka theksuar se UÇK-ja po e tund Strasburgun dhe ka shkruar: UÇK në çdo zemër, në çdo zë.
Ndryshe, protesta ka nisur në orën 13:00 dhe, sipas OVL-UÇK-së, pritet të marrin pjesë mijëra qytetarë, përfshirë shumë nga mërgata kosovare.
Gjatë organizimit janë përgatitur gjithashtu 285 letra që do t’u dërgohen anëtarëve të Asamblesë së Këshillit të Europës, duke kërkuar mbështetje për çështjen e ish-krerëve të UÇK-së.
Ky është protesta e katërt që organizohet pas atyre të zhvilluara në Hagë, Prishtinë dhe Tiranë.
Më 5 nëntor, janë shënuar pesë vjet nga arrestimi i ish-krerëve të UÇK-së, Hashim Thaçi, Kadri Veseli, Jakup Krasniqi dhe Rexhep Selimi, të cilët janë akuzuar nga Gjykata Speciale për krime lufte.
Organizatat e dala nga lufta e UÇK-së kanë deklaruar se ata po përballen me padrejtësi dhe se nuk do të dorëzohen në kërkesën e tyre për drejtësi./teve1.info./
