Deputeti i PDK-së, Fadil Nura ka deklaruar se dorëheqja e Memli Krasniqit nga posti i kryetarit të partisë ishte një vendim i papritur për kryesinë.
Sipas Nurës, rreth 90% e anëtarëve të kryesisë janë befasuar me lajmin, megjithëse ai vlerësoi gatishmërinë e Krasniqit për t’ia liruar rrugën një figure që e sheh si më të përshtatshme për të avancuar PDK-në në të ardhmen.
Nura e cilësoi Bedri Hamzën si figurën e duhur për të drejtuar partinë, duke përmendur meritat dhe sukseset e tij si në të kaluarën, ashtu edhe në ekzekutivin komunal të Mitrovicës gjatë katër viteve të fundit.
Ai shprehi bindjen use Bedri Hamza ka rrugën e hapur dhe se mund të jetë kryeministri i ardhshëm i Kosovës.
“Mendoj që Krasniqi ka shpreh gatishmëri që të lirojë rrugën dhe të ia jep dikujt cili mendon që e avancon PDK-në dhe pozitën e saj në të ardhmen në pozita më të larta. Jam i befasuar me dorëheqjen e tij nuk e kemi pritur, por është vendim i tillë. 90% e kryesisë atë ditë jemi befasuar me këtë lajm. Bedri Hamza është figura e duhur dhe figura e cila është me plotë merita dhe plotë suksese si në të kaluarën por edhe në ekzekutiv në komunën e Mitrovicës për katër vite. Mendoj që e ka rrugën e hapur dhe shpresoj që do të jetë kryeministër i ardhshëm i Kosovës”, deklaroi Nura në emisionin “Ditari” në Tëvë1.
Duke komentuar rezultatet zgjedhore, Nura u shpreh se PDK kishte pretendime për të fituar më shumë komuna, por nuk arriti t’i mbante as ato që kishte më herët.
Ai theksoi se në disa raste partia nuk dha shembull të mirë, veçanërisht në Mitrovicë, ku sipas tij procesi zgjedhor u komprometua.
Në fund, ai u shpreh se ndonëse PDK ka marrë vlerësime të larta në zgjedhjet e kaluara, këtë herë sipas tij është bërë një hap mbrapa në drejtim të demokracisë.
“Ne kemi pretenduar që do i shtojmë edhe disa komuna të tjera, nuk kemi mundur me i mbajte ato komuna të cilat i kemi pasur dhe i kemi pretenduar, Drenasin nuk e shoh si të humbur, nuk kemi dhënë një shembull të mirë në zgjedhjet lokale sidomos në Mitrovicë, është komprometuar zgjedhjet, kemi pasur lëvdate nga qytetarët një notë të lartë të vlerësimit për zgjedhjet që i kemi bërë në të kaluarën si në komuna si në zgjedhjet qendrore, në këtë rast dyshoi se kemi bërë një hap mbrapa në drejtim të demokracisë”, tha ai ndër të tjera./teve1.info/
